ಕಣ್ಣು ಮುಚ್ಚಾಲೆ

ಬಯಕೆಯ ಜಾಡು ಹಿಡಿದು
ದೂರ ಸಾಗಿದ ಕನಸು
ನನ್ನವಳ ಕಂಡೊಡನೆ ನಿಂತುಬಿಟ್ಟಿತು


ಅವಳ ಮೊಗವ ಕಾಣುವ ತುಡಿತಕೆ
ಕಥೆಯೇ ಮರೆತಂತೆ
ದಿಕ್ಕು ಕಾಣದೆ ಸ್ತಬ್ಧವಾಯಿತು

ಅದೇ ನೋಟ ಅದೇ ನಗು
ಹಾ ಇವಳೆ ಪ್ರತಿ ಕನಸಿನಲೂ
ಕಾಡುವ ಕಳ್ಳಿ ಮನಸಿಗೆ ಖಾತ್ರಿಯಾಯಿತು

ಸನಿಹ ಹೋಗುವ ಹವಣಿಕೆ
ಏಕೋ ಏನೋ ಎದೆಯ ಬಡಿತ
ಮನದ ದುಗಡತೆ ಇಮ್ಮಡಿಸಿತು

ಮೌನ ಬಯಕೆಗಳಿಗೆ
ನೋಟದಲೆ ಉತ್ತರಿಸುತ
ಅವಳ ಮೊಗ ನೋಡು ನೋಡುತಲೆ ಮರೆಯಾಯಿತು

ದಿಕ್ಕೆ ತೋಚದೆ ಆತುರದಿಂದ
ಅವಳ ಎಳೆಯಲು ಜಿಗಿದರೆ
ಧುತ್ತೆಂದು ಯಾರೋ ಹೊಡೆದ ಅನುಭವ

ಕಣ್ಣು ಉಜ್ಜುತ ನೋಡಿದರೆ
ಕೆಳಗೆ ನಾನು ಪಕ್ಕದಲಿ ಮಂಚ
ಹುಸಿ ನಗುತ್ತ ನಾನಲ್ಲ ನೂಕಿದ್ದು ಅನ್ನಬೇಕೆ

ಅದೇ ಕನಸು ಅದೇ ಪಾಡು
ಅದೇ ಅನುಭವ ಮತ್ತೆ ಮತ್ತೆ
ನಾನು ಮಾತ್ರ ಬಲಿ ಪಶು ಅವಳ ಕಣ್ಣು ಮುಚ್ಚಾಲೆಗೆ